Sunday, April 24, 2011

ထာဝရ မနက်ဖြန်

စီးချက်ကျကျ ခုန်နေတဲ့နှလုံးသားတစုံ
စက္ကန့်နဲ့အမျှ ပြောင်းလဲနေတဲ့ စိတ်တွေနဲ့
မှန်းရခက်တဲ့ မနက်ဖြန်တွေအတွက်
ရာဇဒဏ်မသင့်ဖို့ ဒီနေ့မှာ လက်တွဲထားမယ်...

ဆုံတွေ့ခဲ့တဲ့ အချိန်တွေက အစ
ခွဲခွာခြင်းမဲ့တဲ့ ထာဝရ အဆုံး
ခုန်နေတဲ့ ရင်ခုန်သံတွေရပ်သွားရင်လဲ
အပြန်အလှန်ပေးဆပ်တဲ့ အချစ်တွေနဲ့ အသက်ဆက်ရှင်မယ်...

ငါ့ကိုမွေးခဲ့တဲ့ ကျေးဇူးရှင်ကတော့ မိခင်
ငါ့ဘ၀ကို လမ်းပြတဲ့ ကျေးဇူးရှင်က ဖခင်
ငါ့လက်ကိုတွဲထားတဲ့ သူကတော့ ငါ့ကိုချစ်တဲ့သူ
ပေးဆပ်သူတွေအတွက် မျှော်လင့်ချက်ဆိုတာ သခင်ပါပဲ...

နှလူံးသားထဲက ဒိုင်ယာရီကို ဖွင့်လိုက်တိုင်း
ငါ့တို့တွေပျော်ခဲ့တဲ့ သမိုင်းတွေနဲ့
ကြည်နူးခြင်းတွေက ဖိတ်ကျ
သူနဲ့အတူရှိခဲ့တဲ့ နေ၀င်ချိန်တွေက ရှုမ၀ပါပဲ...

အတ္တ မာန်မနကင်းတဲ့ အချစ်တွေနဲ့
တည်ဆောက်ခဲ့တဲ့ ငါ့တို့တွေအတွက်
လမ်းမခွဲကြေးဆိုတာက အဘိဓာန်မှာမရှိပေမဲ့
ခဏလောက်ဝေးနေရတာ ဆယ်ကမ္ဘာခြားနေသလိုပဲ...

အချစ်ကို စတင်မွေးဇွားခဲ့တဲ့ စက်တင်ဘာနံနက်ခင်း
ဘယ်တော့မှ မပျက်ယွင်းရအောင် အချိန်နဲ့အမျှ ကြံဆောင်
မြင်ယောင်နေခဲ့ အတူရှိခဲ့တဲ့ နေ၀င်ချိန်နဲ့ အိမ်ပြန်ချိန်
အတူရှိနေမဲ့ ထာဝရ မနက်ဖြန် နဲ့ ကမ္ဘာဆုံးမဲ့ စက္ကန့်အချိန်ထိ
အချစ်ကို သံသရာရှင်းစွာ ချစ်နေမယ်...

"မင်းကိုချစ်တဲ့သူ"

Saturday, April 16, 2011

လူတွေနဲ့ဘ၀

ရက်တွေအပြန်အလှန်ကုန်ဆုံး
လူတချို့မှာတော့ ကျရှုံး
တောင်လိုပုံနေတဲ့ အမုန်း
မရုန်းနိုင်အောင် သဘာဝကချည်နှောင်ထားခဲ့...

နေအထွက်နဲ့ နေအ၀င်
လမဲ့တဲ့ မှောင်မိုက်တဲ့သဲတောင်ပြင်
လူတွေရဲ့ စိတ်အထင်အမြင်
ဘယ်အချိန်တွင် ကြည်လင်ကြမလဲ...

ပြင်ဆင်ချက်မဲ့တဲ့ တစက္ကန့်အချိန်
ဦးတည်ချက်မဲ့တဲ့ ရွေ့နေတဲ့တိမ်
ပြည့်နေတဲ့ သောကတွေနဲ့လူမှာ
အသက်ရှူစရာ လမ်းပျောက်နေခဲ့...

ရောက်လေရာ အရပ်တွေမှာ
လောကကြမ္မာဆိုတာ ဇာတ်ဆရာ
လူသားတွေက ကကြိုးပမာ
ရုပ်ဆိုးစွာ တိုက်ခတ်နေခဲ့ကြ...

ပြိုပျက်နေတဲ့ အုတ်တံတိုင်းတွေလို
လူတွေရဲ့ စိတ်မှာ ညိုမှိုင်း
အိုဟိုင်းဟိုင်း အတွေးတွေနဲ့
ခရီးတွေကို ဆက်နေကြဆဲ...

ဖြစ်ပြီးပျက်တတ်တဲ့ လောကနဲ့
ရှင်သန်နေတဲ့ လူတွေအတွက်
နေစဉ်သုံးနေတဲ့ မှန်တချပ်
ရူပါတစ်ခုထဲအတွက် မဟုတ်ဘူး...

လိုတမရတဲ့ လူ့ဘ၀မှာ
ပူစာတတ်တဲ့ ကလေးတွေလို
ငြီးငြူနေမဲ့ အစား
လူရာကို ပြေးယူကြပါလား...

တွေးပူစရာမလိုရအောင်
အတ္တတွေကို ဘေးချိတ်
မာန်မာနကို အတိတ်မှာထားလို့
ခရီးသွားအချင်းချင်း ကူညီရိုင်းပင်းရင်
လောကမှာ စစ်မြေပြင်ဆိုတာ ဘယ်ရှိလိမ့်မလဲ....

P.S. "အလှအတွက် မှန်ကြည့်သလို ဘ၀အတွက်စာကြည့်ပါ...
မိမိရဲ့ စိတ်ထားတွေကိုလဲ အလှအတွက် မှန်ကြည့်တိုင်း
တစ်ခေါက်လောက် ဖတ်ကြည့်ပါ"

"မင်းကိုချစ်တဲ့သူ"